Home / Liedjes / Mien Gröngerlaand

Mien Gröngerlaand

Schrijver: A.H. Smith
Op de melodie van: Hoch vom Dachstein an
Met dank aan Bob v.d. Brink voor het insturen van de tekst

Tusschen Lauwerszee en de Roeten Ee,
Van de Wadden tot ’t Zuudlaodermeer,
Waor de Eemsmond braid in de Noordzee gait,
Ligt ’n hail mooi laand zoo vet as smeer.
’t Is mien Gröngerlaand, mien geboortelaand (bis)
’t Is het laand, dat ‘k boven alles eer. (bis)

Over ’t golvend nat van het wiede wad
Zweeft de witte maiw in ’t zunnelicht.
Bie de diek daornaost op de kwelder graost
’t Bonte vij, dat ’t naargns beter krigt.
’t Is mien Gröngerlaand… enz.

Waor de waite gruit en het koolzaod bluit
En de laiwerk boven ’t koren zingt,
Waor de ale kaant omringd deur waidelaand
’t Mooie Schildmeer in de zunne blinkt
’t Is mien Gröngerlaand… enz.

Waor bie Heilgerlee ais Graof Aodolf stree
En veur ’t vaoderlaand zien leven luit,
Zeg het monument: ’t is alom bekend,
Dat in ieders hart de vrijheid gluit.
’t Is mien Gröngerlaand… enz.

Van de Houk naor Knaol, fabrieken altemaol
En waor vrouger barre heide was
Lacht de dalgrond nou de vlietige boeren tou
Want er is gain spoor van veen of plas
’t Is mien Gröngerlaand… enz.

As ‘n staile rots in het golfgeklots,
Kikt Martini over veld en meer.
Zoo ook, staark as staol, stait de Gröngertaol,
Dat ’s de spraok, waorin ik zing en reer.
O, mien Gröngerlaand, mien geboortelaand (bis)
Doe bist ’t laand, dat ik boven alles eer. (bis)