De here mit d’r kraag en de biend en d’r hood
en de jonge mit de kap en’t koelwirk in’t blood
de here mit de herses en de ciefers in d’r kop
en de jonge mit de sjöp en de koale boave d’rop
Me hauw diekkop wie d’r Groethof en d’r Wemmers en d’r Raedts
die woste alles beeter en die sjproke och nog sjtaats
en koelköp wie d’r Lamber en d’r Tuuën en d’r Sjeng
koste deun nit teëgesjpreeke, want die sjproke mit de heng
De here mit d’r kraag en de biend en d’r hood
en de jonge mit de kap en’t koelwirk in’t blood
mar d’r heer mit de herses droog de kroën op d’r kop
en d’r jong mit de sjöp kreeg de koale boave d’rop
Vuur de kluuëtjes mit ‘ne titel woar ’n villa mit chauffeur
mar de jonge mit de patsj die moste lope op de blöar
woasjte heer, dan doogste dinkwirk, hauwste moelwerk, zoëgezag
oane hood, dan doogste voel wirk, kroogste’t koelwerk bijgebracht
De here in d’r zjwatte toog, mit böadje en tonsuur
die zote mit de pietebere hej an ’n besjtuur
de kamerade van Rolduc versjtonge zich wal same
en de jonge mit de sjöp knikde rujjig joa en ame
Zoegaar deë dweësje Poels en ziene vrunk, d’r Doames Frens
en jonge wie d’r Maene of d’r ouwe Palme Hens
die kalde mit et Sinte Berb en beënde bej d’r Paus
woëste doe es koempel ongeni zoë veuel och neet an hauws
De here mit d’r boek, de sigaar en d’r hood
en de jonge mit d’r Sjtoemel enne hart va good
de here van d’r eenheidsbund, d’r katholieke kloep
en d’r jong mit d’r pungel bleef d’r erme sjloep
Al die here mit d’r hood en al die jonge mit de patsj
die hont e good sjtuk werk gedoa, mar dat likt in d’r pratsj
de here mit de herses en de jonge mit de sjöp
die trekke noe da rente, joa, mar weë zit mit d’r sjtöb?
Tesame hont ze’t opgebouwd, de koale-industrie
de jonge van de villas en die oet de kolonie
mar woë is’t noe gebliëve, dat miljoënerendement?
d’r Mijnsjtriëk kinste gelle vuur e knepke en ‘ne cent
De here mit’t geld hont noe e dieker kapitaal
de jonge mit de sjöp hont noe ’n sillicosekwaal
de here mit de cente hont et sjpek al lang geïnd
mar d’r jong mit de kap vrit de iëlend van de plint
