Met dank aan Alberta T van Dijk Imminga voor het insturen van de tekst
’t Was bie Jansen stil in schure,
Noadat hai zien zwien har slacht.
“k Mag mie achter nait meer zain, man”.
Was dou voak zien jammerklacht.
Ook zien vraauw mocht er nait over.
’t Hok leeg, aargerd’heur terdeeg.
Vot, as ’t kon, mos Jansen zörgen
Dat hai weer ’n bigje kreeg.
Van zien waarklu heurde Jansen
Op zien doageliekse loop,
Dat er in het dörpscafeetje
’n Toom biggen was te koop.
Zulfde middag nog, noa oldert,
Was ol Jansen vot al doar
En kwam noa ’n beetje pingeln
Mit de zwienekoopman kloar.
’t Bigje wuir dou in ain zak stopt,
Bleef eerst bie het zwienhok stoan.
Boas wol eerst ‘n klokje kopen
Kom toch zo noar huus nait goan.
Moar het bleef er nait die aine
Van ol Jansen wos men dat.
Eerst nam hai ’n fladderakje
En dou nog ’n stok of wat………
Flink bestoven ging ’t op hoes of
En zien vraauw ruip: “Ba, doe zwien !
Hou komst doe zo slim bezopen ?
Zitst weer vol mit brandewien ?”
“Niks heur moeke”, zee dou Jansen,
“‘k Heb allein ’n bigge kocht
‘d Allerbeste oet de koppel
Dat hast doe van mie nait docht…..
‘k Docht, doe zolst wel bliede wezen.
Laive tied, wat kikst ja wicht.
Stoa nait zo te aggawairen,
Hoal dien mond ais even dicht”.
Toesterg ston zien vraauw te kieken
Over ’t schot van ’t zwienehok.
Dou heur man mit hail veul wurgen
Aan ’n dik end zakbaand trok.
’t Lukte en de zak ging open
Jansen raip: “Doar komt hai heur !”
En ……..’n dikke grieze koater
Schoot hom tussen bainen deur.
Kastelain har hom dat leverd
Dou hai doen zat in de kroug.
Jansen kreeg de bienoam “Poeie”,
Dij hai hail zien leven droug.
We gebruiken cookies om er zeker van te zijn dat u onze website zo goed mogelijk beleeft. Als u deze website blijft gebruiken gaan we ervan uit dat u dat goed vindt. Meer informatie
Wij gebruiken cookies om ervoor te zorgen dat onze website voor de bezoeker beter werkt. Daarnaast gebruiken wij o.a. cookies voor onze webstatistieken.
