Zo was’t bie oons in hoes

(Twents)

Toen ik geboor’n bin was ik nog heel jong.
Mien va en mo war’n nich in hoes, dee war’n op’t eerappellaand.
Dat laand was nich van oons,
maar wie haal’n d’r altied oonze eerappel vandan.
Wie war’n bie oons in hoes met 20 kinder,
10 jongs, 9 meikes en den lest’n is altied de jongste bleev’n.
Wie sleup’n op’n sloapkamer met gasmaskers op.
Omdat wie moar één bèr had’n was het sloap’n moeilijk.
‘t Eerste kind wör in berre leg en as’t slöp wörre d’r oet haald en teeg’n de muur zet.
Dan kwam de volg’nde an de beurt en zo moar wieder.
Met het wakker word’n kwam het nich zo nauw.
Ze hebt mie één keer daag’n teeg’n de muur loat’n stoan,
veur dat ze’t in de gaat’n kreeg’n.
Oonze wekker was’n emmer, ……….en as den vol was was’t 7 uur.
As mien Va s’oavonds völ dronk’n had, leep’n emmer oawer.
Joa, ….wie war’n allemoal erg knap.
Eén van mien breurs is kunstenaar,
den geet met nen oal’n jas noar’t kaffee
en kump er met’n nie’n weer oet.
Mien Mo speul’n de luiers nooit, wie bint met melkpoeder groot bracht,
……..ze kon de luiers zo oetschudd’n.
Wie moss’n natuurlijk wa suunig lèèv’n.
Toiletpapier moss’n wie aan twee kaant’n gebroek’n,
en dan ging’t nog noar de stomerie.
Mien Va kon nich good heur’n,
wie hadd’n hem de oor’n van de kop vrett’n
Bie oons att’n ze nooit met mes en vork.
wie deed’n oonze waffel lös, en mik’n er wat in,
en de Va deed’t mondstuk weer doal.
Oonze jongs heet’n allemoal Jan,
behalve Frits, den heet Hennik.
Eén van mien zusters was zo biedehand,
zee was laast noar de markt en hef doar 6 köpkes koch veur’n rieksdaalder,
moar weetie wat noe zo jammer is ?
De oortjes zaat’n ann de vekeerde kaant.
En dan de jongst’n dee klaag’n altied oawer pien in’n boek.
De Mo zee dan; wees toch blie daj’n boek hebt,
aj den nich hadd’n dan veul’n oe de eerappel zo in’n bokse.
Mien oaltste breur is 59, hee har 60 kun’n ween,
moar hee is’n joar zeek wes.
Mien ene zuster is zo schel,
as ze huult loopt heur de troon’n op’n scholder.
Toen ik op school kwam was ik 6 joar.
Ik kon good met de meester opscheet’n.
Verscheidene klass’n bin ik twee keer deurloop’n.
De aander’n mossen elk joar noar’n andere klas hen.
De meester vreug mie een keer;
aj 12,= schult hebt bie’n bakker, 10,= bie’n slager en 13,= bie’n greunteboer; ho vol schuld hij dan?
Ik zee; dat weet ik nich meester,
want as wie zoo vòl schuld hebt verhuust wie meestal.
Joa en noe mos ik oe van dee aander´n ook nog wat vertell´n,
moar ik weet´t nich meer.
Allennig nog iets van oons Hennik,
toen den van school kwam, dee mien Va hem bie´n smid.
Den gaf hem´n hamer en zee as ik knik, dan moj sloan.
Nou hee hef moar één keer knikt.
Joa, …….en zo was´t dan bie oons.
En noe moj natuurlijk mien naam nog weet´n
om mie´n paar entoosjaste breev´n te schriev´n.
No leu, dat is dan ……..Snuverink.